محمد النصراوي
.
إحنه ربات المضايف والدلال
مواكدنا دفو المجبل والدلال
يهالتنشد عن الملكة والدلال
هذن بأطباعنه ودمنه سرية
.
هاشم الكرعاوي
.
سهمي ولافرد مره خطاطير
ويمكمش بسمه اتمكمش خطاطير
يجيني الملح لجروحي خطاطير
ومضيف الحسن جن ممدود بيه
.
مالك الناصري
.
 لضيفي الزاد اقدمه يوميانه
واضل محتار كله يوميانه
چهبته بچلمه طَيبه يوميانه
هلا وجيتك شرف تنحسب ليه
.
حسيب الغزي
.
رحيلك نار وانه اصبحت دلت
گهوه ويابت الشمات دلت
وكلام الله اذا فد يوم دلت
بعگلي انه انتحر وابليك بيه
.
واثق الكرناوي
.
يخي بل خير دوم اتفور دلاك
واعرفك مـــاتتيه الكلب دلاك
صرت كدمــــا ادور بيك دلاك
ادلك بل رجـــــل واتعين بيه
.
حسيب الغزي
.
أيا گمگم تعالى بزود دلاي
توج النار للمضياع دلاي
مضيف وشجره والعنگود دلاي
شبع وفياي واصياره تچيه
.
واثق الكرناوي
.
اعرفك مــــــــاتخيّب يوم دلاي
جميل وجــل رطب ينّلاح دلاي
حسيب ومن اتيه اضواك دلاي
ويعلمني الدرب لومـــــــال بيه
.
حسيب الغزي
.
يتيهني الدرب وافطن دلالاي
نارك وأنسى بس يمك دلالاي
ادگ الگهوه واتخمهه دلالاي
وتفوح بهيل بيدك مو بديه
.
واثق الكرناوي
.
تفوح ابهيل مـو دلتي دلالاك
وافرح لــــــو يمر يمي دلالاك
تايه كلبي يــل غالي دلالاك
وعلمه اعليك لنك تبقى اليه
.
حسيب الغزي
.
يفوح الطيب من صلبك ودلات
والك فنجان ما يركد ودلات
يجيك الضيف ومعوز ودلات
براسك تعزب اچمول ميه
.
واثق الكرناوي
.
صبح للتاه عنوانــــــــــــه يدلّي
حسيب ابجفـــــه للوادم يدلّي
ابخيره وكلبي لافعـــــاله يدلي
ابفضل اعماله وي خيره عليـه
.
حسيب الغزي
.
اليجيني بعسر متوازي لدله
عليك يرد فره ويهه لدله
اصيرلك يمر يسعر لدله
واريدك هيل حيل تفور بيه
.
واثق الكرناوي
.
دوي ابموكَــدك وافرح لنه ادلاك
ويريت اوصل لعد بابك لنه ادلاك
اذا صار الـــوكت يمك لنه ادلاك
دحطني اكبال وكتك وامش بيه
.
حسيب الغزي
.
الينشدك وين صار الحزن دله
عليه مصاكك الصفصاف دله
كچيمه وخدرت شمات دله
بجفاك تصير هيچ فلوك بيه
.
واثق الكرناوي
.
حرت تاه الفكـــــــــر بيكم شدلي
وتمرنه الشاص يم حجيك شدلي
تلعثم حجيي بلسانه شـــــــدلي
اذا انت الشعـــــــــر وانت القضية
.
موجوع يقلبي .... كاظم الزيادي
.
ديوان الكرم منفتح يهل تنشد ع. .ديواني
قطعه ارض من هل عراق اسمت باسم. .ديواني
تدرون يهل الخلك اصلي تره. .ديواني
بلكرم دوم معترف وبلفزع تلكاني
.
أشرق ألهلالي
.
 ندرله ابطيب اهلنه من يدرنه
قاصي وداني نطعم من يدرنه
يفر بينه دهرنه من يدرنه
ندور اشما ندور النه الحميه
.
كريم الشاعر
.
 گبل الباب افك الگلب للياي
وراثه من هلي بالجود للياي
لون ماعزب الخطار للياي
وحس دنياي چنها تضيج بيه
.
حسن ابو الحديد
.
وحگ كل عگل بل حكمه..لداراي...
كه بزر الشيب لليجبل....لداراي..
اچيم ضلوعي نار أدل..لداراي...
الضحه وتحلف غدت عربان بيه
.
الشاعرفلاح السوداني
.
يضل جدمي اعلا درب الخير حباي
ويضل يروي العطش ناكوط حباي
ويضل سنبل حناني يهيل حباي
واضل اطحن عشك للجاي اليه.
.
نصير الجنابي
.
ادگ عل عود للخطار وبناي
واله عرش بدليلي اشد وبناي
تلگه الضيف مرحب صدر وبناي
الكرم والجود لاماهن سویه